Тус үзэсгэлэн нь анх 1999 онд МАЖХ-ны гишүүн байгууллагуудын санаачлагаар зохиогдож эхэлсэн түүхтэй ба энэ жил 20 дахь жилдээ 2019 оны 03 дугаар сарын 29, 30, 31-ний өдрүүдэд зохиогдоно. Үзэсгэлэн нь цар хүрээ, оролцогчдын тоогоор Монголд зохиогддог хамгийн том үзэсгэлэн төдийгүй аялал жуулчлалын бизнес эрхлэгчдийг хооронд нь холбож, шинэ бизнесийн түнш олох, гэрээ хэлэлцээр хийх, бараа бүтээгдэхүүнээ сурталчлах, борлуулах зэрэг бизнесийн төрөл бүрийн боломжийг бүрдүүлж өгдөг давуу талтай. Сүүлийн жилүүдэд хөдөө орон нутгийн аялал жуулчлалын компани, жуулчны баазууд өөрийн аймгийн аялал жуулчлалын газраар дамжуулан нэгдсэн зохион байгуулалттай оролцдог уламжлалтай болоод байна. 2018 онд 18 аймаг нэгдсэн зохион байгуулалттайгаар, тур оператор, жуулчны бааз, ресторан зоогийн газар, их дээд сургууль, сургалтын төв, аяллын хэрэгсэл ханган нийлүүлэгч, гар урлалын компани, дуу бүжгийн чуулга, музей зэрэг дотоодын 289 аж ахуйн нэгж байгууллага, Түрк, ОХУ, Япон, Сологос, БНХАУ-ын аялал жуулчлалын байгууллагын төлөөлөл оролцож үйл ажиллагааны цар хүрээ өргөжиж байгаа билээ. Зохион байгуулагчид 2013 оноос үзэсгэлэнгийн түнш аймгийг шалгаруулж, хамтран зохион байгуулж ирсэн уламжлалтай бөгөөд өмнөх жилүүдэд Өвөрхангай, Өмнөговь, Архангай, Дорноговь, Ховд, Завхан аймгууд түншээр оролцож, аймаг орон нутгаа сурталчлан оролцсон бол 2019 онд Увс аймаг үзэсгэлэнгийн түнш аймгаар оролцохоор шалгарч, шилжин явах тугаа хүлээн авсан билээ.
Д.Содномсамдан
